قومی اسمبلی میں جمعہ کے روز اپوزیشن کی بڑی جماعت پاکستان مسلم لیگ(ن) نے وفاقی بجٹ برائے سال 2012-13 کے موقع پر شدید ہنگامہ آرائی کی

اسلام آباد(ثناء نیوز) قومی اسمبلی میں جمعہ کے روز اپوزیشن کی بڑی جماعت پاکستان مسلم لیگ(ن) نے وفاقی بجٹ برائے سال 2012-13 کے موقع پر شدید ہنگامہ آرائی کی ۔ ارکان دست و گریبان ہو گئے۔ ایک دوسرے پر تھپڑ رسید کیے ۔ وزیر خزانہ ڈاکٹر عبدالحفیظ شیخ کی بجٹ تقریر کے دوران ایوان حکومت مخالف نعروں سے گونجتا رہا۔ اپوزیشن ارکان نے بجٹ دستاویز پھاڑکر وزیر خزانہ کی طرف پھینک دئیے ۔ وزیر خزانہ کاگھیراؤ کیا گیا ۔ ’’ مک گیا شو گیلانی ، گو گیلانی گو‘‘ ، قوم بھوکی مار دی ہائے پیپلزپارٹی ، گیلانی تیرے ضابطے ہم نہیں مانتے۔ ‘‘ اور دیگر نعرے لگائے ۔ حکومت کے سرکردہ اراکین نے وزیراعظم سید یوسف رضا گیلانی کے گرد حفاظتی دیوار بنا دی تھی ۔ اپوزیشن ارکان کو وزیراعظم کی جانب نہ آنے دیا حکومت اور اپوزیشن کے اراکین کے درمیان شدید تلخ کلامی بھی ہوئی ۔ سپیکر ڈائس کے سامنے سینئر ارکان کو دھکے پڑے ۔ سید خورشید شاہ، قمر زمان کائرہ ، رانا فاروق سعید اراکین کے درمیان بیچ بچاؤ کراتے رہے۔ قومی اسمبلی میں چھ بجکر کر دس منٹ پر وزیر خزانہ ڈاکٹر عبدالحفیظ شیخ نے بجٹ تقریر شروع کی تو پاکستان مسلم لیگ (ن) کے اراکین نے حکومت مخالف مبنی پلے کارڈز اٹھاکر وزیر خزانہ کا گھیراؤکر لیا ۔ اور ڈاکو ، ڈاکو ، جو مشرف کایار ہے و ہ غدار ہے ، وہ غدارہے ۔ مک گیا شو تیرا گیلانی ، گو گیلانی گو ، مشرف کے پٹھو کا بجٹ نامنظور ، گرتی ہوئی دیواروں کو ایک دھکا اور دو ، جھوٹ بولنا بند کرو ، گیس چور اور بجلی چور نا منظور ، نعروں کے دوران پاکستان مسلم لیگ(ن) کے شکیل اعوان ، پیپلزپارٹی کے جاوید وڑائچ کے درمیان تلخ کلامی ہو گئی ۔ بات ہاتھا پائی تک پہنچ گئی ۔ اور ارکان سپیکر ڈائس کے سامنے ارکان دست و گریبان ہو گئے ۔ ایک دوسرے پر تھپڑوں کی بارش کردی ۔ قمر الزمان کائرہ ، سید خورشید شاہ ،جاوید وڑائچ کو اپوزیشن ارکان سے چھڑا کر لے گئے ، وزیر خزانہ کے ساتھ کھڑے ہو گئے ۔ بجٹ تقریر کے دوران اپوزیشن کی شدید ہنگامہ آرائی جاری رہی ، اس دوران ڈاکٹر فردوس عاشق اعوان نے پاکستان مسلم لیگ(ن) کی خواتین اراکین سے پلے کارڈز چھین کر پھاڑ دئیے جس پر پاکستان مسلم لیگ(ن) کی خواتین مشتعل ہو گئیں اور مزید پلے کارڈز لے کر حکومتی نشستوں کی جانب آگئیں اور حکومت کے خلاف نعرے بازی کردی ۔ بجٹ تقریر کے دوران ایوان حکومت مخالف نعروں سے گونجتا رہا ۔ ڈاکٹر فہمیدہ مرزا ن ہاؤس اور آرڈر ہاؤس کی ہدایات جاری کرتی رہیں۔ اپوزیشن نے ارکان نے سپیکر کی ہدایات کو نظر انداز کردیا۔ وزیراعظم سید یوسف رضا گیلانی کے گرد حکومتی ارکان حفاظتی دیوار بنا کر کھڑے ہو گئے تھے۔ بجٹ تقریر کے بعد وزیراعظم سیدیوسف رضا گیلانی متعدد ارکان کے ہمراہ ایوان سے باہر گئے اس دوران پاکستان پیپلزپارٹی کے اراکین نے نعرے لگائے