پیپلز پارٹی اور اتحادی جماعتوں کی جانب سے نامزد وزیراعظم مخدوم شہاب الدین اور سابق وزیراعظم یوسف رضاگیلانی کے بیٹے موسی گیلانی کے ایفیڈرین کوٹاکیس میں وارنٹ گرفتاری جاری کر دئے گیے
راولپنڈی(ثناء نیوز )پیپلز پارٹی اور اتحادی جماعتوں کی جانب سے نامزد وزیراعظم مخدوم شہاب الدین اور سابق وزیراعظم یوسف رضاگیلانی کے بیٹے موسی گیلانی کے ایفیڈرین کوٹاکیس میں وارنٹ گرفتاری جاری کر دئے گیے ہیں نجی ٹی وی کے مطابق راولپنڈی میں اینٹی نارکوٹکس فورس کورٹ کے جج شفقت اللہ خان نے نا قابل ضمانت وارنٹ جاری کیے واضح رہے کہ اے این ایف کی تفتیشی ٹیم نے ایفیڈرین کوٹاکیس میں عدالت کو وارنٹ جاری کرنیکی استدعا کی تھی ۔حکمران اتحاد کی طرف سے وزارت عظمی کے مضبوط امیدوار مخدوم شہاب الدین کا تعلق ضلع رحیم یار خان کے نواحی علاقے میاوالی قریشاں سے ہے۔ وہ تین مرتبہ این اے 194 سے رکن قومی اسمبلی منتخب ہوچکے ہیں۔ ملک کی نامور کاروباری شخصیت ہونے کی وجہ سے ان کا نام بہترین ماہرین معاشیات میں لیا جاتا ہے۔ مخدوم شہاب الدین بے نظیر بھٹو حکومت میں وزیر خزانہ کے عہدے پر فائز رہے۔ پیپلز پارٹی کے موجودہ دور حکومت میں مخدوم شہاب الدین کے پاس 5 وزارتوں کا قلم دان رہا۔ مخدوم شہاب الدین سیاسی اور مذہبی گھرانے سے تعلق رکھتے ہیں۔ وہ گدی ما مبارک کے سجادہ نشین بھی ہیں۔ مخدوم شہاب الدین کے والد مخدوم حمید الدین 1977 میں ذوالفقار علی بھٹو کی کابینہ کے وزیر پٹرولیم و قدرتی وسائل رہ چکے ہیں۔ مخدوم شہاب الدین اپنے حلقے میں پیپلزپاٹی کا مضبوط ووٹ رکھنے کی وجہ سے پارٹی میں اہم مقام رکھتے ہیں۔
تبصرے