کراچی میں پرتشدد واقعات اور فائرنگ کےمختلف واقعات میں 13افراد جاں بحق ہو گئے

کراچی(ثناء نیوز ) کراچی میں پرتشدد واقعات اور فائرنگ کےمختلف واقعات میں 13افراد جاں بحق ہو گئے ، پولیس و رینجرز نے مختلف علاقوں میں کارروائی کرتے ہوئے بارہ مشتبہ افراد کو حراست میں لے لیا۔ فائرنگ کا تازہ واقعہ کراچی کے علاقے تین ہٹی بلوچ مسجد کے قریب پیش آیا جہاں نامعلوم افراد کی فائرنگ سے ایک شخص جاں بحق ہو گیا۔ اورنگی ٹاؤن مومن آباد کالونی میں بھی ایک شخص نامعلوم گولی کا نشانہ بنا۔ کراچی کے علاقے لیاری سے صبح گلہ کٹی تشدد زدہ لاش برآمد ہوئی۔ سرجانی کے علاقے میں نامعلوم افراد کی فائرنگ سے زخمی ہونے والا احتشام اسپتال میں زندگی کی بازی ہار گیا۔ کھوکھرا پار میں مسلح افراد کی فائرنگ سے ارسلان جاں بحق ہوگیا جبکہ ناظم آباد گول مارکیٹ میں نامعلوم افراد کی فائرنگ سے یاور مہدی نامی شخص کو موت کے گھاٹ اتار دیا۔ ملیر ندی سے بھی ایک شخص کی تشدد زدہ لاش برآمد کی گئی۔ ادھر پی آئی بی کالونی تھانے کی حدود میں واقع عسکری پارک کے عقب میں نامعلوم ملزمان نے دستی بم حملہ کیا تاہم کوئی جانی نقصان نہیں ہوا۔کراچی کے علاقے فیڈرل بی ایریا میں دستی بم کے حملے میں چار افراد زخمی ہو گئے۔ تفصیلات کے مطابق فیڈرل بی ایریا میں یوسف پلازہ کے قریب قائم سیمنٹ ایجنسی پر نامعلوم افراد دستی بم پھینک کر فرار ہو گئے۔ دستی بم کے دھماکے کی زد میں آ کر چار افراد زخمی ہو گئے۔ دھماکے کے بعد علاقے میں شدید خوف و ہراس پھیل گیا۔ پی آئی بی کالونی تھانے کی حدود میں واقع عسکری پارک کے عقب میں بھی نامعلوم ملزمان نے دستی بم حملہ کیا تاہم اس حملے میں کوئی جانی نقصان نہیں ہوا۔