کابینہ کی دفاعی کمیٹی میں نیٹو سپلائی کی بحالی پر اتفاق ہو گیا ہے

اسلام آباد(ثناء نیوز ) کابینہ کی دفاعی کمیٹی میں نیٹو سپلائی کی بحالی پر اتفاق ہو گیا ہے آج(بدھ کو) وفاقی کابینہ کی جانب سے توثیق کے بعد بحالی کا باضابطہ اعلان کر دیا جائے گا۔ امریکہ کو دفاعی کمیٹی کے اتفاق رائے سے آگاہ کر دیا گیا ہے۔حکومت نے دعویٰ کیا ہے کہ امریکہ سے تعلقات کی بحالی کا فیصلہ پارلیمانی سفارشات کے مطابق کیا جا رہا ہے۔ کابینہ کی دفاعی کمیٹی کا اجلاس وزیر اعظم راجہ پرویز اشرف کی صدارت میں منگل کو اسلام آباد میں ہوا۔ امریکی و اتحادی افواج کے ساتھ تعاون کے لیے پارلیمنٹ کی جانب سے طے کردہ نئی شرائط کار کا جائزہ لیا گیا۔ پارلیمنٹ نے نیٹو سپلائی کی بحالی کو سلالہ چیک پوسٹ پر حملے کے حوالے سے امریکی معافی سے مشروط کیا تھا۔وزیراعظم راجہ پرویزاشرف نے کہا ہے کہ دفاعی کمیٹی ملک کااہم پالیسی سازفورم ہے ایوان وزیر اعظم میں ہونے والے کابینہ کی دفاعی کمیٹی کے اجلاس میں خطاب کے موقع پر وزیر اعظم کا کہنا ہے کہ پاک امریکاتعلقات پرپارلیمنٹ نے اہم سفارشات دے دی ہیں .نیٹوسپلائی روٹس پراپنی پوزیشن کاازسرنوجائزہ لیاہے ،نیٹوسپلائی بندش نے نہ صرف پاک امریکابلکہ49ملکوں کیساتھ تعلقات متاثرکیے لیکن ہم متحدہوکراپنے قومی مفادات کے تحفظ کیلئے کمربستہ ہیں.امریکاکومتعددمرتبہ واضح کیاکہ برابری اورباہمی اعتمادسازی پرتعلقات چاہتے ہیں. راجہ پر ویز اشرف نے اپنے خطاب میں اپنے اس عزم کا ایادہ کیا کہ پاکستان دہشتگردی کیخلاف عالمی برداری کیساتھ کام کرنے کیلئے پرعزم ہے.وزیر اعظم نے مسلح افواج کو پاکستان کے قومی تشخص اوراستحکام کاستون بھی قرار دیا۔اجلاس میں عسکری و سیاسی قیادت کے درمیان نیٹو سپلائی کی بحالی پر اتفاق ہو گیا ہے۔ ذرائع کے مطابق اجلاس کے بعد وزیر خارجہ حنا ربانی کھر نے امریکی وزیر خارجہ ہیلری کلنٹن کو ٹیلیفون کیا اور بات چیت کے دوران اس بات کا عندیہ دیا کہ نیٹو سپلائی بحال کی جا رہی ہے۔وزیر خارجہ نے امریکی ہم منصب کو یہ بھی بتایا ہے کہ نیٹو سپلائی کے حوالے سے راہداری کے اخراجات وصول نہیں کرے گا۔ کمیٹی میں اسلحے کے بغیر نیٹو سپلائی کی بحالی پر اتفاق ہوا ہے۔ یاد رہے کہ پارلیمنٹ نے اپنی سفارشات میں اس معاملے کو انتظامی قرار دے دیا تھا حکومت کو ہر قیمت پر پاکستان کے مفادات کے تحفظ تعاون کے بارے میں تحریری معاہدوں کی سفارش کی تھی۔کابینہ کی دفاعی کمیٹی کے اجلاس میں نائب وزیراعظم چوہدری پرویز الہی،وزیردفاعی پیداوار سردار بہادر احمد سہڑ،وزیر خزانہ ڈاکٹر عبدالحفیظ شیخ،وزیر خارجہ حنا ربانی کھر، وزیر اطلاعات قمر زمان کائرہ، چیئر مین جوائنٹ چیفس آف سٹاف کمیٹی جنرل خالد شمیم وائیں، چیف آف آرمی سٹاف جنرل اشفاق پرویز کیانی، چیف آف ایئر سٹاف ایئر چیف مارشل طاہر رفیق بٹ، پاک بحریہ کے قائمقام سربراہ وائس ایڈمرل تنویر فیض، ڈی جی آئی ایس آئی، لیفٹیننٹ جنرل محمد ظہیر الاسلام، ڈی جی آئی آفتاب سلطان اور متعلقہ سینئر حکام نے شرکت کی۔ کابینہ کی دفاعی کمیٹی کے فیصلے کے آج باضابطہ طور پر وفاقی کابینہ سے توثیق کرائی جائے گی وزیر اعظم ارکان کو اعتماد میں لیں گے۔