مسلم لیگ ن کے صدر میاں نواز شریف نے کہا ہےکہ پاکستانی عوام کو درپیش تمام مسائل کا حل معیشت کو دوبارہ پٹڑی پر ڈالنے میں پوشیدہ ہے

لاہور (ثناء نیوز )مسلم لیگ ن کے صدر میاں نواز شریف نے کہا ہےکہ پاکستانی عوام کو درپیش تمام مسائل کا حل معیشت کو دوبارہ پٹڑی پر ڈالنے میں پوشیدہ ہے، مسلم لیگ ن نے پہلے دور حکومت میں دنیا بھر میں پاکستان کو تیزی سے ابھرتی معیشتوں کا سرتاج قرار دلوایا تھا۔پیر کو لاہور میں سابق وزیر خزانہ سرتاج عزیز کی زیر صدارت منشور کمیٹی کا اجلاس ہوا۔ کمیٹی کے نام اپنے پیغام میں نواز شریف نے کہا کہ عوام مسلم لیگ ن کے آزمودہ اور کامیاب دماغوں سے توقع رکھتے ہیں کہ وہ ماضی کی کامیابیوں کو حالیہ صورتحال بدلنے میں کامیاب ہوں گے اور ایک دفعہ پھر اندھریوں میں ڈوبے ملک کو روشن صبح کی نوید دے سکتے ہیں۔ نواز شریف نے کہا کہ ایک ایسے پروگرام کے تشکیل اور پھر اس پر مقررہ وقت میں عمل درآمد ہماری ذمہ داری ہے۔ جو پاکستانی عوام کو وہ ماحول فراہم کرسکے کے وہ اپنے لئے بھی رزق حلال کما سکیں اور پاکستان کی ترقی میں بھی اپنا کردار ادا کرسکیں۔ اجلاس میں سرتاج عزیز، سینیٹر پرویز رشید، چودھری جعفر اقبال، ماروی میمن، نزہت عامر، صدیق الفاروق، طارق عظیم، اسفندیار بھنڈارا، جنرل ریٹائرڈ قیوم ، اورڈاکٹر آصف کرمانی سمیت دیگر اہم رہنما بھی موجود ہی تھے ۔ واضح رہے کہ پارٹی کے سربراہ نے مسلم لیگ ن کا منشور تیار کرنے کی ہدایت کی ہے جس میں کہا گیا ہے کہ غربت مہنگائی ،بے روزگاری اور لوڈ شیڈنگ کے خاتمے کی سفارشات تیار کی جائیں۔ منشور کمیٹی میں مسلم لیگ ن کے سیاسی ،معاشی ،توانائی ،سماجی ،ثقافتی ،تعلیم ،صحت اور امن و امان سے متعلق ماہرین کے علاوہ مسلم لیگ ہم خیال گروپ کے مرکزی رہنما ہمایوں اختر خان بھی موجود ہیں ۔اجلاس میں قومی ایجنڈے کے نام سے تیار تجاویز کا مسودہ غور وخوص کے لیے پیش کیا گیا۔