پارلیمانی قومی سلامتی کمیٹی نے اقوام متحدہ کے جائزہ مشن کے لاپتہ افراد کے معاملے پر دورہ پاکستان کے بارے میں وزارت خارجہ و وزارت داخلہ سے بریفنگ کو مسترد کردیا

اسلام آباد (ثناء نیوز )پارلیمانی قومی سلامتی کمیٹی نے اقوام متحدہ کے جائزہ مشن کے لاپتہ افراد کے معاملے پر دورہ پاکستان کے بارے میں وزارت خارجہ و وزارت داخلہ سے بریفنگ کو مسترد کردیا ۔ کمیٹی کو مطمئن کرنے کے لیے وزیر خارجہ حنا ربانی کھر کو بلایا گیا ہے ۔ پارلیمانی قومی سلامتی کمیٹی نے لاپتہ افراد کے معاملے پر قانون سازی کے لیے متفقہ طور پر سفارشات کی منظوری دیدی ہے ۔ لاپتہ افراد کی بازیابی اور اس مسئلے کے مستقل حل کے لیے قانون کا موثر مسودہ تیار کرنے کا فیصلہ کیا گیا ہے ۔ اس معاملے پر تمام متعلقہ اداروں کو جواب دہ بنایا جا رہا ہے۔پارلیمانی قومی سلامتی کمیٹی کا اجلاس پیر کو کمیٹی کے چیئرمین سینیٹر میاں رضا ربانی کی صدارت میں پارلیمنٹ ہاؤس میں منعقد ہوا ۔ سینیٹر اسحاق ڈار ، وزیر اطلاعات قمر زمان کائرہ ، حیدر عباس رضوی ، آفتاب احمد خان شیر پاؤ ، سینیٹر میر حاصل خان برنجو ، سینیٹر مشاہد حسین سید ، سینیٹر کلثوم پروین اور دیگر ارکان نے شرکت کی ۔ وزارت خارجہ اور وزارت داخلہ کے ایڈیشنل سیکرٹری نے اقوام متحدہ کے ورکنگ گروپ کے دورہ پاکستان کی بریفنگ دی ۔ وزارت خارجہ کے قائم مقام سیکرٹری نے بتایا کہ حکومت پاکستان نے باضابطہ طورپر ورکنگ گروپ کو دورے کی دعوت دی تھی اس بارے میں وزیر مملکت برائے برائے خارجہ امور ملک عماد خان نے بھی بعض امور سے کمیٹی کے ارکان کو آگاہ کیا ۔ کمیٹی نے بریفنگ پر عدم اطمینان کا اظہار کیا ہے اور آئندہ اجلاس میں وزیر خارجہ حنا ربانی کھر کمیٹی میں پیش ہوں گی ۔ اجلاس کے بعد میڈیا سے بات چیت کرتے ہوئے سینیٹر رضا ربانی نے کہا کہ کمیٹی نے لاپتہ افراد کے معاملے پر اقوام متحدہ کے ورکنگ گروپ کے د ورہ پاکستان پر حکومتی بریفنگ پر عدم اطمینان کا اظہار کیا ہے ۔ انہوں نے کہا کہ اقوام متحدہ کے گروپ کو داخلی معاملے پر دورے کی دعوت دینا غلط روایت ہے لاپتہ افراد کے معاملے کو پاکستان کے قومی اداروں کو دیکھنا چاہیے قومی سلامتی کے معاملے پر فوج اور سیاسی قیادت یکجا ہے ۔ اس معاملے پر کوئی دو رائے نہیں پائی جاتی ۔ ملک انتہائی حساس ترین حالات سے دو چار ہے ۔ قومی سلامتی مقدم ہونی چاہیے ہمیں بتایا گیا ہے کہ وزارت خارجہ نے ورکنگ گروپ کو دورے کی دعوت دی تھی رضا ربانی نے بتایا کہ کمیٹی نے لاپتہ افراد کے معاملے پر قانون کے مسودے کی خواندگی مکمل کرلی ہے ۔ آئندہ اجلاس میں مسودے کی حتمی منظوری دیدی جائے گی سفارشات کو متفقہ طور پر منظو رکرلی گئی ہے ۔ قانون کا مسودہ موثر اورجامع ہو گا اور اس میں ہر پہلو کو شامل کرنے کی کوشش کی گئی ہے ۔ آئندہ اجلاس اکتوبرمیں ہوگا۔




Ehtasabi Amal Lahore احتسابي عمل لاھور