پاکستان مسلم لیگ (ن) کے صدر محمد نواز شریف نے کہا ہے کہ پاکستان کو درپیش سنگین داخلی و خارجی مسائل میں آج بھی قائد اعظم محمد علی جناح ؒ کے افکار و نظریات ہمارے لئے مشعل راہ ہیں۔ بانی پاکستان کے یوم وفات پر اپنے بیان میں محمد نواز شریف نے کہا کہ ہم داخلی سطح پر مختلف مسائل سے دوچار ہیں

لاہور (ثناء نیوز)پاکستان مسلم لیگ (ن) کے صدر محمد نواز شریف نے کہا ہے کہ پاکستان کو درپیش سنگین داخلی و خارجی مسائل میں آج بھی قائد اعظم محمد علی جناح ؒ کے افکار و نظریات ہمارے لئے مشعل راہ ہیں۔ بانی پاکستان کے یوم وفات پر اپنے بیان میں محمد نواز شریف نے کہا کہ ہم داخلی سطح پر مختلف مسائل سے دوچار ہیں۔ قومی یکجہتی کی بجائے علاقائی ، نسلی و لسانی تعصبات کو ہوا دینے کی کوشش کی جارہی ہے اور مزید افسوس ناک بات یہ کہ وقتی سیاسی و جماعتی مفادات کے لئے یہ کھیل حکومت کی جانب سے کھیلا جارہا ہے۔ عدلیہ کے فیصلوں سے رو گردانی اور ججوں کی تضحیک و توہین معمول بن گئی ہے۔ انہوں نے کہا کہ عام آدمی کے لئے دو وقت پیٹ بھرنا دوبھر ہوگیا ہے۔ کمر توڑ مہنگائی اور بے روزگاری نے زندگی اجیرن کردی ہے۔ قومی معیشت جاں بلب ہے۔ ہماری قومی خود مختاری آئے روز پامال ہورہی ہے۔انہوں نے کہا کہ عوام جلد از جلد عام انتخابات چاہتے ہیں تاکہ وہ اپنے ووٹ کے ذریعے نااہل اور بددیانت حکمرانوں سے نجات حاصل کرسکیں لیکن مختلف حیلوں اور حربوں سے انتخابات کو ٹالنے کے منصوبے بنائے جارہے ہیں۔ ایسے میں قائد اعظم کے افکارو نظریات اور کردار و عمل کو راہنما بنا کرہی ہم ان تمام مسائل سے نجات حاصل کر سکتے ہیں۔ انہوں نے مزید کہا کہ قائد کے تصور پاکستان کے مطابق اسلامی جمہوری و فلاحی معاشرے میں غیر مسلم اقلیتوں کے تمام بنیادی حقوق کی ضمانت بھی موجود ہے جہاں اُن کی حیثیت بھی اپنے دوسرے پاکستانی بہن بھائیوں کی طرح برابر ہوگی اور وہ اپنے عقائد کے مطابق زندگی بسر کرنے میں آزاد ہونگے۔انہیں اپنی عبادت گاہوں میں جانے کی بھی مکمل آزادی ہوگی اور اُن کی جان مال اور عزت و آبرو بھی مسلمانوں کی عزت و آبروکی طرح محترم او ر محفوظ ہوگی اور قومی تعمیر و ترقی میں وہ بھی اپنا بھرپور کردار ادا کریں گے۔ نواز شریف نے کہا کہ قائد اعظم کے یوم وفات پر ہم خوشحال، خود داراور خودمختار پاکستان کے لئے جدوجہد کو تیز تر کرنے کے عہد کی تجدید کرتے ہیںجو حضرت قائد اعظم کی زیر قیادت مسلم لیگ اور برصغیر کے کروڑوں مسلمانوں کا خواب تھا۔