وزیراعظم راجہ پرویز اشرف نے کہا ہے کہ اتحادی حکومت نے عوامی نمائندوں کو بغیر کسی امتیاز کے ریکارڈ ترقیاتی فنڈز دیئے ہیں

اسلام آباد(ثناء نیوز ) وزیراعظم راجہ پرویز اشرف نے کہا ہے کہ اتحادی حکومت نے عوامی نمائندوں کو بغیر کسی امتیاز کے ریکارڈ ترقیاتی فنڈز دیئے ہیں۔موجودہ پارلیمنٹ دانش مندانہ پالیسیوں اور اتحادی پارٹیوں کی قیادت کی حکمت عملی کی وجہ سے اپنی مدت پوری کرے گی ۔ان خیالات کا اظہار انہوں نے گزشتہ روز وزیراعظم ہاؤس میں اتحادی جماعتوں کی پارلیمانی پارٹی کے اجلاس سے خطاب کرتے ہوئے کیا۔وزیراعظم نے کہا کہ موجودہ اتحادی حکومت نے مثال قائم کی ہے کہ سیاسی قوتیں عوام کی فلاح اوربہتری کے لیے آپس میں ہاتھ ملا سکتی ہیں انہوں نے کہا کہ شہید بے نظیر بھٹو کے ویژن کے مطابق مفاہمتی پالیسی نے پیپلز پارٹی کی حکومت کو سیاسی فلسفہ دیا ہے۔حکومت یہ سمجھتی ہے کہ اپنے اتحادیوں کی مدد سے ہم پارلیمنٹ کے دو ایوانوں سے آسانی سے قانون سازی کا عمل مکمل کر لے گی جیسا کہ اس سے پہلے گزشتہ ساڑھے چار سالوں میں ہوا ہے وزیراعظم نے اپنے اتحادیوں سے کہا کہ وہ پارلیمنٹ میں ہونے والی بحث میں حصہ لیں اور قانون سازی کے عمل میں حصہ لے کر اپنی ذمہ داریاں پوری کریں۔ انہوں نے کہا کہ انہیں اراکین پارلیمنٹ کے انفرادی اور اجتماعی مسائل کا علم ہے اور میں یقین دلاتا ہوں کہ حکومت انہیں حل کرنے یا کم سے کم کرنے کے لیے بھر پور کوشش کرے گی۔راجہ پرویز اشرف نے کہا کہ اگرچہ حکومت کو امن و امان کی خراب صورتحال ورثے میں ملی ہے لیکن پھر بھی ہم نے بہترین کارکردگی کا مظاہرہ کیا ہے۔انہوں نے گزشتہ ساڑھے چار سال کے دوران پارلیمنٹ میں ہونے والی قانون سازی کی تعریف کی اور اسے بہترین کامیابی قرار دیا۔اجلاس میں وزیر پورٹس اینڈ شپنگ بابر غوری،وزیر سفیران انجینئر شوکت اﷲ،سینیٹر مظفر علی شاہ،انور علی چیمہ،جمیلہ گیلانی نے ایم کیو ایم ، فاٹا،مسلم لیگ ( فنکشنل)،مسلم لیگ(ق) اور اے این پی نمائندگی کرتے ہوئے وزیراعظم کو یقین دلایا کہ ان کے جماعتیں پارلیمنٹ کے اندر اور باہر وزیراعظم کی مکمل حمایت جاری رکھیں گی۔