چیف جسٹس افتخار محمد چوہدری نے بلوچستان میں امن و امان اور لاپتہ افراد کے معاملے پر وفاقی حکومت سے یکم جون تک جواب طلب کرتے ہوئے ریمارکس دیے ہیں کہ حکومت آئین کے آرٹیکل 148پر عمل نہیں کررہی

کوئٹہ(این این آئی )چیف جسٹس افتخار محمد چوہدری نے بلوچستان میں امن و امان اور لاپتہ افراد کے معاملے پر وفاقی حکومت سے یکم جون تک جواب طلب کرتے ہوئے ریمارکس دیے ہیں کہ حکومت آئین کے آرٹیکل 148پر عمل نہیں کررہی، اس سے پہلے کہ کوئی مارشل لاء لگائے ہمیں آئین پر عملدرآمد کرنا چاہئے،  صوبے میں ترقی صفر ہے،جب گھر میں آگ لگی ہو تو پہلے اسے بجھانے کی کوشش کرنی  چاہیئے، لوگ کہہ رہے ہیں کہ قانون نافذ کرنے والے ادارے مسخ شدہ لاشیں پھینک رہے ہیں۔ علما تک محفوظ نہیں مگر حکومت کو کوئی دلچسپی نہیں۔ صوبے کے وزیر کا کہنا ہے کہ یہاں کے وزرا ء بد امنی میں ملوث ہیں۔ چیف جسٹس فتخار محمد چوہدری نے یہ ریمارکس سپریم کورٹ کوئٹہ رجسٹری میں بلوچستان میں امن و امان اور لاپتہ افرادسے متعلق کیس کی سماعت کے دوران دئیے