خیبر ایجنسی کی تحصیل لنڈی کوتل بازار میں گاڑی میں دھماکے سے 26افراد جاں بحق جبکہ 65سے زائد افراد زخمی

لنڈی کوتل( ثناء نیوز)خیبر ایجنسی کی تحصیل لنڈی کوتل بازار میں گاڑی میں دھماکے سے 26افراد جاں بحق جبکہ 65سے زائد افراد زخمی ،زخمیوں کو فوری طبی امداد کے لئے لنڈیکوتل ہسپتال منتقل کیا گیا،دھماکے کا نشانہ بازار ذخہ خیل آڈا تھا،کسی نے واقعے کی ذمہ داری قبول نہیں کی ہے،دھماکے میں درجن سے زائد دکانیں تباہ ہوگئی ہے تفصیلات کے مطابق ہفتے کے روز تقریباً گیارہ بجے لنڈیکوتل بازار چارباغ روڈ پر ایک گاڑی میں نصب بارودی مواد کا زور دار دھماکا ہوا جس میںذرائع کے مطابق 26افراد جان بحق جبکہ 65سے زائد افراد زخمی ہوگئے۔زخمیوں کوفوری طبی امداد کے لئے لنڈیکوتل ہسپتال منتقل کیا گیا جبکہ 20افراد کی حالت تشویشناک ہونے کی وجہ سے پشاور منتقل کیا گیا۔ ذرائع کے مطابق زخمی ہونے والوں میں چار سکول کے بچے اور تین خاصہ دار بھی شامل ہیں ۔سرکاری ذرائع کے مطابق دھماکے کا نشانہ ذخہ خیل قومی آڈہ ہوسکتا ہے کیونکہ تیراہ ذخہ خیل میں ایک امن لشکر بنایا گیا ہے جو عسکریت پسندوں کے خلاف برسر پیکار ہے۔دھماکے کے بعد لوگوں میں خوف وہراس پھیل گیا اور لوگوں نے فوراًاپنی دکانیں بند کی ۔دھماکے کوفوراًبعد سیکیورٹی فورسز اور خاصہ دار فورس کے جوان موقع پر پہنچ گئے اور امدادی کاروائیاں شروع کی اس موقع پر عام لوگوں کے علاوہ الخدمت ایمبولینس اور رضا کاروں نے بھی امدادی کاروائیوں میں حصہ لیا۔لیکن اسسٹنٹ پولیٹکل ایجنٹ موجود نہیں تھے۔واضح رہے کہ اس آڈے کے بارے میں اسسٹنٹ پولیٹکل ایجنٹ کو کئی بار نشاندہی کی گئی تھی لیکن اس اڈے کو خطرے کے باوجود بازار سے باہر منتقل نہیں کیا گیا۔ذرائع کے مطابق دھماکہ نیٹو سپلائی لائن کی ممکنہ بحالی کے لئے کھلا پیغام ہے کیونکہ اسی راستے سے نیٹو سپلائی لائن گزرتی ہے ۔